Inicio / Noticias / A Xunta publica no DOG a aprobación definitiva da modificación puntual do proxecto sectorial do parque empresarial da Veigadaña, en Mos, para adaptalo á demanda actual
10/04/2018 - 13:54

Santiago de Compostela, 10 de abril de 2018.- A Consellería de Infraestruturas e Vivenda publica hoxe no Diario Oficial de Galicia (DOG) a aprobación definitiva da modificación puntual do proxecto sectorial do parque empresarial da Veigadaña, en Mos, para adaptalo á demanda actual.

No seguinte enlace ao DOG pódese ampliar a información da resolución publicada hoxe: https://bit.ly/2GMuAeL

Cómpre lembrar que o Consello da Xunta aprobou o pasado 8 de marzo esta modificación puntual co obxectivo de adecuar as súas ordenanzas á demanda existente en dito parque empresarial.

A modificación puntual do proxecto sectorial incide sobre determinadas magnitudes da ordenación do parque empresarial, como a superficie mínima das parcelas e as condicións de parcelación, os usos predominantes e compatibles do solo do parque empresarial. Neste sentido, increméntanse os posibles usos do solo dotándoo de flexibilidade para adaptalo á evolución da demanda.

No parque empresarial de Mos adxudicáronse desde 2009 máis de 261.000 metros cadrados de solo empresarial en compravenda ou dereito de superficie, o que converte a este parque empresarial nun importante polo de desenvolvemento económico do sur da provincia de Pontevedra.

Actualmente no parque empresarial de Mos existen 18 parcelas dispoñibles para a venda ou adxudicación en dereito de superficie. A superficie total das mesmas é de 131.780 metros cadrados.

O prezo das parcelas do parque empresarial de Mos está bonificado nun 30 % e tamén se poden adxudicar en dereito de superficie, cun canon anual dende 2,12 euros por metro cadrado os dous primeiros anos.