A Lama (Pontevedra), 23 de outubro de 2023

O delegado territorial da Xunta en Pontevedra, Agustín Reguera, visitou esta mañá as obras realizadas no Parque Empresarial de O Racelo, no concello da Lama.

Os traballos, que mellorarán as infraestruturas viarias do interior do polígono, son posibles grazas ás axudas da Xunta para a habilitación e mellora de infraestruturas dos parques empresariais de Galicia. En concreto, esta actuación recibiu un apoio de máis de 41.000 euros.

Con estas axudas, que deixaron na provincia de Pontevedra máis de 640.000 euros, a Xunta de Galicia busca actualizar estes espazos tan importantes para o desenvolvemento empresarial da comunidade autónoma. Entre os parques beneficiados atópanse, o Parque Empresarial de Uceira, no concello de Cañiza; o Polígono Industrial A Pedreira, en Meaño; o Polígono Industrial Merlín, no concello de Agolada; o Parque Empresarial de Campaña, en Valga; o Parque Empresarial de Nantes, en Sanxenxo; o Polígono Industria A Facha, en Campo Lameiro; o Polígono Industrial Sete Pías, en Cambados; o Polígono Industrial do Camballón, en Viladecruces; e o Polígono de Chan da Ponte, en Salvaterra do Miño.

Neste sentido, o delegado territorial destacou o impulso que “estas obras ofrecen ao tecido empresarial de toda Galicia en xeral e da provincia de Pontevedra en particular”.

Ademais, Reguera quixo lembrar o compromiso da Xunta cos empresarios que deciden investir na comunidade autónoma e o seu esforzo para que Galicia “siga sendo un lugar atractivo e con todas as comodidades necesarias para desenvolver calquera actividade empresarial”.

Está previsto que as obras no Parque Empresarial de O Racelo terminen nas próximas semanas e que permitan mellorar a seguridade viaria das centos de persoas que cada día se desprazan ao lugar, ademais de aumentar a comodidade dos transportistas. Cabe destacar que esta liña de axudas conta con máis de 2.4 millóns de euros concedidos en toda Galicia que reverterán directamente a favor do tecido empresarial galego.