Santiago de Compostela, 13 de decembro de 2023

A Consellería de Infraestruturas e Mobilidade vén de iniciar os traballos de acondicionamento dunha parada de autobús na estrada autonómica AC-419 na Bugalleira, na parroquia de Santo André de Tallo, no concello de Ponteceso.

Esta intervención supón un investimento autonómico de máis 47.000 euros e a empresa encargada da súa execución é Construcciones López Cao, S.L..

As obras que se están a levar a cabo permitirán resolver a ausencia de parada de autobús en ambas as marxes da estrada AC-419 na zona da Noria, ao seu paso polo municipio.

Con esta actuación a Xunta atende á petición trasladada pola asociación STOP Accidentes de cara a mellorar a seguridade viaria e o acceso nesta zona da estrada autonómica na que fan parada os autobuses escolares do CEIP Ramón Otero Pedrayo.

As actuacións en execución para a mellora da seguridade viaria céntranse na eliminación de vexetación, mellora da visibilidade e mellora da iluminación.

A intervención inclúe a ampliación do espazo ao redor das paradas, sinalización de limitación de velocidade e/ou de precaución por presenza de peóns.

Ademais, para mellorar a accesibilidade á parada habilitarase un itinerario peonil seguro coa correspondente sinalización indicativa de paradas.

Nestes momentos están a executarse traballos previos e demolicións, ademais da limpeza das marxes da estrada, a retirada do refuxio existente, demolición e fresado de firme, e traslado de sinais verticais.

Despois continuarase avanzando na intervención co movemento de terras, escavación en caixa, recheo e terraplén para contención de terras; ao que lle seguirá a iluminación, firmes e pavimentos, xunto coa extensión de zahorra e mesturas bituminosas en quente. Finalmente acometerase a sinalización, co pintado de marcas viarias e a colocación de sinalización vertical.

A urbanización da contorna permitirá a conformación dun espazo para peóns de formigón con bordo, recolocación do refuxio e colocación de tótem sinalizador de parada.