A Xunta aborda esta semana a limpeza nas marxes de tres estradas autonómicas nas provincias de Lugo, Ourense e Pontevedra

Santiago de Compostela, 6 de agosto de 2024

A Consellería de Vivenda e Planificación de Infraestruturas desenvolve ao longo desta semana os traballos de limpeza nas marxes de tres estradas autonómicas ao paso polas provincias de Lugo, Ourense e Pontevedra.

No caso da provincia da Lugo, as actuacións levaranse a cabo en distintas vías autonómicas: na vía de altas prestacións CG-2.3 e na estrada autonómica LU-862, en Viveiro e Xove; na CG-2.1, ao seu paso por Monforte de Lemos, Pantón e O Saviñao; e na estrada LU-533 no seu percorrido polos concellos de Chantada e O Saviñao.

Tamén se desenvolverán traballos de roza e limpeza na OU-402, en Castrelo de Miño, Ourense.

En canto á provincia de Pontevedra, proseguirán as intervencións na comarca do Morrazo, na CG-4.1 e na autovía AG-4.6, que unen os municipios de Moaña e Cangas.

As actuacións consisten no roce de vexetación na zona de dominio público das estradas autonómicas, así como no acondicionamento de zonas verdes en sendas peonís e glorietas e a reposición ou reparación de elementos de valado perimetral das estradas.

A Xunta, con este programa, segue a intensificar as súas accións para previr o risco de lumes e contribuír ao reforzo da seguridade viaria mediante o aumento da visibilidade e as accións para facilitar o tránsito de peóns e ciclistas.

Estas intervencións están enmarcadas no novo contrato coa empresa pública Seaga para o control da biomasa das marxes das estradas autonómicas, que conta, tralo recente incremento de 1 M€; cun investimento total de 4 M€ para os dous próximos anos.