Lugo, 11 de xaneiro de 2025
A Xunta construirá unha senda peonil na estrada LU-234 en Ombreiro, no Concello de Lugo, que suporá un investimento de 610.500€ e favorecerá os desprazamentos seguros da veciñanza.
Así o sinalou hoxe a conselleira de Vivenda e Planificación de Infraestruturas, María M. Allegue, que xunto co delegado territorial da Xunta en Lugo, Javier Arias, presentou hoxe esta actuación.
A intervención forma parte da 2ª fase do Plan de Sendas de Galicia, que está a impulsar a Xunta, tras autorizar en decembro un investimento de 70M€ para sumar máis de 120 novos quilómetros de itinerarios ata o ano 2027.
A conselleira explicou que a 1ª fase deste plan xa permitiu ter construídos case 300km de itinerarios nas marxes das estradas autonómicas na comunidade e agora estase a traballar nesta segunda fase.
Recordou que o pasado 26 de decembro saíu a licitación a redacción dos proxectos dos primeiros itinerarios desta 2ª fase, entre os que se atopa esta senda prevista en Ombreiro.
Indicou que o prazo de presentación de ofertas remata o 30 deste mesmo mes, polo que a Xunta agarda que este proxecto poida comezar a redactarse a mediados deste ano.
Este itinerario disporá dunha lonxitude de algo máis de 1 km e irá dende ponte Ombreiro ata Torre de Riazón. O obxectivo é facilitar a mobilidade segura e sostible nesta contorna do municipio lucense.
María M. Allegue subliñou a importancia de reforzar a seguridade dos usuarios máis vulnerables das vías, que son os peóns e os ciclistas. Engadiu que as sendas favorecen os desprazamentos a pé dos cidadáns, pero dun xeito máis cómodo, máis seguro e máis saudable.
Remarcou que, ademais da boa acollida destas actuacións por parte dos municipios e dos veciños, ao mellorar a súa calidade de vida, o Plan de Sendas de Galicia impulsado pola Xunta foi recoñecido nos Premios europeos á excelencia na seguridade viaria 2024.
Concluíu que grazas á experiencia que atesoura a Axencia Galega de Infraestruturas na construción destas sendas peonís e ciclistas, a Xunta segue traballando para sumar novos quilómetros, conscientes de que estes itinerarios incentivan os desprazamentos non motorizados, reducindo tráfico e emisións; promoven o exercicio físico; e acadan un valor recreativo e turístico nas contornas nas que se habilitan.