A Estrada (Pontevedra), 14 de marzo de 2025
O director xeral de Comercio e Consumo, Gabriel Alén, participou hoxe na inauguración da 13ª Feira de Oportunidades do Comercio e a 69ª Feira de Antigüidades e Artesanía —na que tamén estivo presente o alcalde da Estrada, Gonzalo Louzao—, que terá lugar no recinto feiral do municipio durante toda a fin de semana, con horario ininterrompido de 11 a 20 horas.
Na visita, Gabriel Alén destacou o papel destas feiras e o traballo dos comerciantes locais no labor de dinamización e pulo do comercio de proximidade. Neste senso, recordou que o prazo de solicitudes para solicitar as achegas da orde da Consellería de Emprego, Comercio e Emigración para o impulso das actividades dos Centros Comerciais Abertos dotada de 2,5M€, aínda está aberta ata o vindeiro mércores 19 de marzo cunha intensidade da axuda que pode chegar ata o 90 %, buscando potenciar ao máximo a calidade e a excelencia das propostas.
Nesta edición da feira—coincidindo coa celebración da Semana do Consumidor—, o Instituto Galego do Consumo e da Competencia estará presente repartindo obsequios aos visitantes e informando sobre o seu labor, lembrando que mañá sábado 15 de marzo se establecerán puntos de información ao consumidor nas 7 grandes cidades de Galicia.