Santiago de Compostela, 20 de outubro de 2024
A Xunta está a executar as obras de acondicionamento de beirarrúas na estrada autonómica PO-551, no lugar de Caiauga, no concello de Moaña.
Esta intervención conta cun orzamento de preto de 35.000 euros e consisten na reparación dun tramo de beirarrúa na marxe esquerda da PO-551, na contorna do punto quilométrico 28+260, no lugar de Caiagua.
As obras execútanse despois da supervisión da beirarrúa levada a cabo polos técnicos da Xunta neste punto da vía, chegándose á conclusión de que os problemas nesta zona viñan orixinados polos asentamentos do subsolo debidos ao lavado e arrastre de finos, xa que as conducións de servizos están en mal estado e pérdese caudal en xuntas e pozos.
Así, para reparar a beirarrúa afectada, os traballos requiren previamente o saneo dos firmes e a retirada e reposición dos colectores en mal estado, tanto de augas pluviais (competencia da Xunta) como de augas fecais (competencia municipal).
Así, os traballos da Xunta coordinaranse co Concello, ao que lle corresponde realizar a reparación do colector de augas fecais.
Mediante este contrato, ademais, neste punto da estrada procederase á rehabilitación superficial do firme da estrada mediante fresado de 5 centímetros e extensión de mestura bituminosa en quente.