Santiago de Compostela, 15 de febreiro de 2025
A Xunta comezará esta vindeira semana os traballos de limpeza e roza nas marxes das estradas autonómicas OU-101, no concello de Ourense; e na OU-402, no seu percorrido polo municipio de Castrelo de Miño.
Estas tarefas continuarán tamén en distintas estradas autonómicas, no seu percorrido polas provincias de Ourense e da Coruña.
En concreto, na provincia de Ourense tamén continuarán coas tarefas iniciadas nas pasadas semanas na OU-208, no concello do Carballiño; na OU-536, en Ourense e Castro Caldelas; e na OU-801; no seu percorrido polo municipio de Ribadavia.
Na provincia da Coruña, continuarán avanzando os trabalos en execución na estrada AC-413, en Ordes.
Seguridade viaria
Todas estas intervencións consisten na limpeza e roza de vexetación na zona de dominio público das estradas de titularidade da Xunta, e na reposición ou reparación de elementos de valado perimetral das estradas autonómicas ou no acondicionamento de zonas verdes en sendas peonís e glorietas.
A Xunta, con este programa, segue a intensificar as súas accións para previr o risco de lumes e contribuír ao reforzo da seguridade viaria mediante o aumento da visibilidade e as accións para facilitar o tránsito de peóns e ciclistas.
Estas intervencións da Consellería de Vivenda e Planificación de Infraestruturas están enmarcadas no contrato coa empresa pública Seaga para o control da biomasa das marxes das estradas autonómicas, que conta cun investimento total de 4 M€ para este e o vindeiro ano.