A Estrada (Pontevedra), 16 de outubro de 2025
O delegado territorial da Xunta en Pontevedra, Agustín Reguera, visitou esta mañá o punto limpo do concello da Estrada, que foi un dos beneficiados polas axudas da Xunta a entidades locais para o financiamento de actuacións en materia de residuos de competencia municipal.
Así, A Estrada recibiu máis de 93.000 euros como parte da liña destinada á realización de melloras nos puntos limpos e grazas á cal poderá aumentar a seguridade e adquirir novos depósitos para residuos especialmente contaminantes.
O delegado territorial aproveitou a visita para lembrar o compromiso da Xunta cun tratamento responsable dos residuos e asegurou que “a Xunta está moi comprometida co coidado do medio ambiente e está disposta a colaborar cos concellos en todo o posible para manter unha contorna limpa, saudable e agradable para todos os galegos e galegas”.
Cabe destacar que estas axudas beneficiaron a un total de 24 concellos da provincia de Pontevedra por valor de máis de 900.000 euros. Na comarca do Deza-Tabeirós foron tres os concellos beneficiados.